لاہور (نمائندہ سپورٹس + پورٹس رپورٹر) فاسٹ باولر محمد آصف سپاٹ فکسنگ سکینڈل میں سزا بھگتنے کے بعد واپسی کی تیاری کر رہے ہیں اور ڈومیسٹک کرکٹ میں اچھی کارکردگی بھی دکھا چکے ہیں اور ان کے مداحوں کی خواہش ہے کہ وہ بھی پاکستان سپر لیگ میں جلوہ گر ہوں۔ سابق ٹیسٹ کپتان سلمان بٹ پی ایس ایل سیزن فور کیلئے لاہور قلندرز کا حصہ بنے تو محمد آصف کے مداحوں کی ناصرف امیدیں روشن ہو گئیں بلکہ ان کے حق میں آوازیں بھی بلند کی جانے لگیں اور اب محمد آصف نے خود بھی شاندار اعلان کر کے اپنے مداحوں کو بے حد خوش کر دیا ہے۔ محمد آصف نے کہا کہ میں نے پی ایس ایل کے اگلے سیزن تک خود کو فٹ کرنے کیلئے پریکٹس شروع کر دی ہے۔ میں نے اس سال پی ایس ایل کو پوری توجہ کیساتھ دیکھا ہے اور امید کرتا ہوں کہ اگلے سیزن میں اس کا حصہ بنوں گا۔ باولرز کی تعداد میں تو اضافہ ہوا ہے مگر باولنگ کا معیار گر گیا ہے اور آپ کو ٹیسٹ میچز جیتنے کیلئے کم از کم 50 فرسٹ کلاس میچوں کا تجربہ چاہئے ہوتا ہے اس لئے ہمیں چاہئے کہ پی ایس ایل میں کارکردگی دکھانے والے نوجوان باولرز کو ٹیسٹ کرکٹ میں شامل نہ کریں۔ کرکٹ بہت مشکل ہو گئی ہے کیونکہ اب تک صرف اور صرف بلے بازوں کی سہولت کیلئے ہی اقدامات اٹھائے جا رہے ہیں جبکہ چھوٹی باونڈریز نے کرکٹ کو بیس بال جیسا بنا دیا ہے کیونکہ بلے باز اب ہر گیند کو ہی باونڈری کے باہر پھینکنا چاہتا ہے۔