نئی دہلی (صباح نیوز) بھارتی فضائیہ کا ایک اور مگ طیارہ گر کر تباہ ہو گیا جبکہ پائلٹ محفوظ رہا۔ طیارے کو حادثہ راجستھان کے علاقے جودھ پور میں پیش آیا۔ بھارتی میڈیا کے مطابق انڈین ایئر فورس کا لڑاکا طیارہ مگ 27 جودھ پور کے قریب گر کر تباہ ہو گیا۔ طیارہ حادثے کا شکار ہونے سے قبل پائلٹ پیراشوٹ سے چھلانگ لگانے میں کامیاب رہا اور کوئی نقصان نہیں ہوا۔ طیارے کو زمین پر گرتے ہی آگ لگ گئی جس کے بعد امدادی کارروائیاں شروع کر دی گئیں۔ حادثے کی تحقیقات شروع کر دی گئی ہے۔ یاد رہے کہ بھارتی ایئرفورس کا ایک جنگی ہیلی کاپٹر بڈگام میں گر کر تباہ ہو گیا تھا جس میں سوار 6 فوجی ہلاک ہو گئے تھے۔ بھارتی میڈیا نے بعدازاں رپورٹ کیا تھا کہ بھارتی فوجیوں نے پاکستانی طیارہ سمجھ کر اپنے ہی ہیلی کاپٹر پر میزائل فائر کیا تھا۔