پرویز الٰہی سے برٹش کونسل پروگرام ’’تعبیر‘‘ کے وفد کی ملاقات
لاہور (خصوصی نامہ نگار) سپیکر پنجاب اسمبلی چودھری پرویزالٰہی سے برٹش کونسل کے پروگرام ’’تعبیر‘‘ کے وفد نے ان کے چیمبر میں ملاقات کی۔ وفد میں سوڈیپ پوکھیرال ایڈوائزر ڈی آئی ایف ڈی نیپال، محمد سعد، عامر خان گورائیہ، حسن ناصر اور فیصل بٹر شامل تھے۔ ارکان اسمبلی رئیس نبیل احمد، سردار محمد اویس دریشک، حنا پرویز بٹ، سیکرٹری اسمبلی محمد خان بھٹی، ڈائریکٹر جنرل پارلیمانی امور عنایت اللہ لک اور ڈپٹی سیکرٹری قانون سازی خالد محمود بھی موجود تھے۔ عامر خان گورائیہ نے سپیکر پنجاب اسمبلی کو بتایا کہ تعبیر مستقبل قریب میں اسمبلی کے ارکان اور سٹاف کی استعداد کار بڑھانے کیلئے سیمینار اور تربیتی ورکشاپس کا انعقاد کرے گی۔ چودھری پرویزالٰہی نے تعبیر کی کاوشوں کو سراہا اور امید ظاہر کی کہ تعبیر کے تعاون سے اسمبلی سیکرٹریٹ بہتر انداز میں سروسز فراہم کر سکے گا۔
