کراچی (صباح نیوز+ آن لائن)کراچی کے علاقے ڈیفنس میں فائرنگ سے پولیس اہلکار سمیت 3افراد جاں بحق ہوگئے،1ملزم کو گرفتار کر لیا گیا ۔ ایس ایس پی سائوتھ پیر محمد شاہ کے مطابق کراچی کے علاقے ڈیفنس فیز 6 خیابان بخاری میں فائرنگ سے 3افراد جاں بحق ہو گئے ، ملزمان گاڑی چھوڑ کر فرار ہو گئے ، جاں بحق پولیس اہلکار کی شناخت خالد محمود کے نام سے ہوئی ۔ خالد محمود درخشاں تھانے میں بطور کانسٹیبل تعینات تھا اور وہ اپنی ڈیوٹی ختم کرکے گھر جارہا تھا جبکہ دوسرا جاں بحق ہونے والا شخص ایک راہگیر ہے اور اس کی شناخت رمضان کے نام سے ہوئی ۔ پولیس نے بتایا کہ سفید رنگ کی گاڑی میں سوار 2 افراد کی جانب سے یہ فائرنگ کی گئی، فائرنگ کرنے والے 2 ملزمان نشے کی حالت میں تھے اور وہ گشت پر موجود اہلکاروں پر فائرنگ کر کے گاڑی چھوڑ کر فرار ہو ئے ۔ ان میں سے ایکملزم کو گرفتار کر لیا گیا ۔واقعہ کے بعد نعشوں اور زخمیوں کو فوری طور پر جناح ہسپتا ل منتقل کر دیا گیا ۔ ہسپتا ل ذرائع کے مطابق زخمی ہونے والا شخص سعید احمد بھی دم توڑ گیا ۔ جائے وقوعہ سے نائن ایم ایم کے چار خول اوررائونڈ برآمد ہوئے۔ ایک ویگو گاڑی کو بھی قبضے میں لیا گیا، تفتیشی ٹیم نے شواہد کی روشنی میں تحقیقات شروع کر دی ہے۔ ایس ایس پی سائوتھ پیر محمد شاہ کے مطابق ایک ملزم کو نشے کی حالت میں گرفتار کیا ہے جو پولیس کو پہلے سے ہی مطلوب تھا۔ انہوں نے بتایا کہ گاڑی کے رجسٹریشن نمبر سے گاڑی کے مالک تک پہنچ گئے ہیں۔ سی سی ٹی وی ویڈیو دیکھی جا رہی ہے جبکہ علاقے کی جیوفینسنگ بھی کی جا رہی ہے۔