لاہور ( سپورٹس رپورٹر+نمائندہ سپورٹس )پی ایس ایل 4 کے کامیاب انعقاد پر پی سی بی نے من پسند افراد کو بونس دینے کا فیصلہ کرلیا ہے۔ نئے ڈومسٹک سٹرکچر ماڈل کے قیام پر سبکی کے بعد پی سی بی نے پیٹرن انچیف وزیراعظم عمران خان کے ویژن کیخلاف ایک اور قدم اٹھانے کا فیصلہ کرلیا ہے۔پی سی بی نے کفایت شعاری مہم کے احکامات ہوا میں اڑ دیے ہیں۔ ذرائع کے مطابق پی ایس ایل فور کے کامیاب انعقاد پر پی سی بی نے مخصوص ملازمین کو بونس دینے کا فیصلہ کیا ہے۔ پی سی بی انتظاامات سنبھالنے والے ملازمین کو ایک تنخواہ بطور بونس دے گا، پی ایس ایل 4 کے کامیاب انعقاد پر مخصوص ملازمین میں بونس کی تقسیم کے لیٹر تقسیم بھی ہوچکے ہیں۔ واضح رہے کہ بورڈ کے سابق چیئرمین نجم سیٹھی گذشتہ ایڈیشنز میں پی ایس ایل الاونس دینے پر تنقید کا نشانہ بن چکے ہیں تاہم پاکستان کرکٹ بورڈ کی موجودہ مینجمنٹ نے بورڈ کے خزانے پر ہاتھ صاف کرنا شروع کر دیئے ہیں۔