راولپنڈی (نیٹ نیوز) آرمی چیف جنرل قمر جاوید باجوہ نے کمبائنڈ ملٹری ہسپتال (سی ایم ایچ) راولپنڈی کے نئے بلاک کا افتتاح کر دیا۔ پاک فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق سی ایم ایچ کے نئے بلاکس کا کام 2013 میں شروع ہوا تھا۔ آئی ایس پی آر کے مطابق بلاکس کی تکمیل کے بعد سی ایم ایچ راولپنڈی میں 1150 بستروں کی گنجائش ہو گئی ہے۔ اعلامیے کے مطابق ہسپتال کی او پی ڈی سے اب روزانہ 5 ہزار مریضوں کا علاج کیا جا سکتا ہے، ہسپتال فوجیوں اور عام شہریوں کی ضروریات پورا کریگا۔ آئی ایس پی آر کے مطابق سی ایم ایچ راولپنڈی اب جدید ترین ہسپتال بن چکا ہے اور ہسپتال اب آرمی، ایئر فورس اور بحریہ کے لیے بیس ہسپتال کا کام کرے گا۔