لاہور(شوبز ڈیسک) کامیڈین ‘ہدایت کار ‘ رائٹرورسٹائل اداکار معین اختر کو مداحوں سے بچھڑے 8سال بیت گئے‘ان کی برسی آج منائی جائیگی ‘معین اختر 24 دسمبر 1950ء کو بمبئی میں پیدا ہوئے تھے۔ انہوں نے فنی زندگی کا آغاز 6 ستمبر 1966ء کو پاکستان کے پہلے یوم دفاع کی تقریب میں کیا تھا جس کے بعد انہوں نے پلٹ کر نہیں دیکھا۔ 1968ء میں انہوں نے نگار فلم ایوارڈ کی تقریبات میں اور 1970ء میں انہوں نے پاکستان ٹیلی وژن پر ضیاء محی الدین شو میں فن کا مظاہرہ کیا، جس کے بعد وہ پاکستانی سٹیج اور ٹیلی وژن کے مصروف ترین فن کار بن گئے۔ حکومت پاکستان نے معین اختر کو صدارتی تمغہ برائے حسن کارکردگی اور ستارہ امتیاز کے اعزازات عطا کیے تھے۔معین اختر 22 اپریل 2011ء کو کراچی میں وفات پاگئے۔ وہ کراچی میں ماڈل کالونی ملیر کے قبرستان میں آسودہ خاک ہیں۔معین اختر نے پاکستان ٹیلی وژن کے لاتعداد پروگراموں کی میزبانی کی جن میں یس سر نو سر اور معین اختر شو کے نام سرفہرست ہیں۔ انہوں نے جن ڈراموں میں یادگار کردار ادا کیے ان میں روزی، مکان نمبر 47، ہاف پلیٹ، عید ٹرین، بندر روڈ سے کیماڑی، سچ مچ اور آنگن ٹیڑھا کے نام شامل ہیں۔ انہوں نے مسٹر کے ٹو، مسٹر تابعدار اور راز نامی فلموں میں بھی کام کیا۔ ان کے مشہور سٹیج ڈراموں میں بکرا قسطوں پر، بچائو معین اختر سے، ٹارزن معین اختر، بہروپیا اور بڈھا گھر پر ہے شامل ہیں۔ 2005ء کے لگ بھگ انہوں نے پرائیویٹ ٹی وی چینل کے ٹاک شو پروگرام لوز ٹاک میں اپنے فن کا مظاہرہ کیا اور اس پروگرام میں 200 سے زیادہ بہروپ بھرے۔