لاہور(سپورٹس ڈیسک) ٹینس کی عالمی نمبر دو کھلاڑی سیمونہ ہالیپ سٹٹ گارٹ اوپن ٹینس سے دستبردار ہو گئیں۔سٹار رومانوی کھلاڑی نے فٹنس مسائل کے باعث ایونٹ نہ کھیلنے کا فیصلہ کیا وہ فیڈ کپ کے دوران کولہوں کی انجری کا شکار ہوئی تھیں۔یاد رہے کہ ماریا شرا پووا، سیلونی سٹیفنز اور ایلینا سویتولینا بھی انجریز کے باعث ایونٹ سے باہر ہو چکی ہیں۔27 سالہ سیمونہ ہالیپ نے کہا کہ انجری کے باعث سٹٹ گارٹ اوپن ٹورنامنٹ نہ کھیلنے پر مایوس ہوں لیکن میں میڈرڈ اور روم اوپن کھیلنے کیلئے پر امید ہوں۔ ذہنی اور جسمانی طور پر 100 فیصد فٹ ہونے کے بعد ہی کورٹ میں واپسی آوں گی۔ فیڈ کپ کے دوران زخمی ہونے کی وجہ سے مایوسی ہوئی تھی تاہم اب میری پہلی ترجیح فٹنس مسائل پر قابو پانا ہے۔