پشاور(این این آئی) وزیراطلاعات خیبر پی کے شوکت یوسفزئی نے کہا ہے کہ 8 سے 10 روز میں صوبائی کابینہ میں ردوبدل ہوسکتا ہے۔ وزیراطلاعات شوکت یوسفزئی نے وزیراعلیٰ محمود خان کے خلاف پروپیگنڈے پر ردعمل ظاہر کرتے ہوئے کہا کہ محمود خان صوبے کے بااختیار وزیراعلیٰ ہیں جو تمام فیصلے خود کرتے ہیں، وہ کم گو اور ایماندار آدمی ہیں۔وزیراعظم عمران خان کو محمود خان پر اعتماد ہے اور ان کی کارکردگی باقی تینوں صوبوں کے وزرائے اعلیٰ سے بہتر ہے۔ انہوںنے کہاکہ حکومت کے اندر اختلافات کی باتوں میں کوئی حقیقت نہیں اور وزیراعلی کے اختیارات میں کوئی دخل اندازی نہیں کرسکتا۔ انہوںنے کہاکہ وہ پورے صوبے پر توجہ مرکوز کر رہے ہیں، ان کی ذات پر آج تک کوئی بھی انگلی نہیں اٹھا سکا۔صوبائی وزیر اطلاعات نے کہا کہ وزیراعلی محمود خان تمام وزراء کی کارکردگی کی نگرانی کر رہے ہیں، 8 سے دس دن میں صوبائی کابینہ میں ردوبدل ہوسکتا ہے، اس کا سادہ فارمولہ ہے کہ کارکردگی دکھانے والے ہی کابینہ میں رہیں گے، جس وزیر کی کارکردگی نہیں ہوگی وہ گھر جائے گا۔