اسلام آباد (سٹاف رپورٹر) ڈی جی آئی ایس پی آر نے پشتون بھائیوں کے نام پیغام بھی دیا ہے جس میں انہوں نے کہا کہ ’’میرے محترم پختون بھائیوں‘ بہنوں‘ مائوں‘ بزرگوں اور نوجوانوں۔ سب سے پہلے میں دل کی گہرائوں سے آپ سب کو سلام پیش کرتا ہوں۔ میں پاک فوج کے نمائندے کی حیثیت سے آپ سب کو ایک پیغام دینا چاہتا ہوں کہ پاک فوج آپ کی ہے۔ جیسے پاکستان ہم سب کا ہے۔ اگر پاکستان خوشحال اور آباد ہو گا۔ تو ہم سب بشمول پختون خوشحال ہوں گے۔ اور اگر خدانخواستہ پاکستان کو کوئی نقصان ہو گا تو یہ ہم سب بشمول پختونوں کا نقصان ہو گا۔ آپ کو علم ہے کہ کچھ لوگ کسی کے ورغلانے پر آپ لوگوں کو پاکستان اور اس کے اداروں کے خلاف اکسانا چاہتے ہیں۔ میں یہ کہنا چاہتا ہوں کہ مملکت پاکستان کو آپ کی قربانیوں کا احساس ہے۔ ریاست اس سلسلے میں دن رات مسلسل کوشش کر رہی ہے کہ آپ کے مسائل حل کر دیئے اور میں آپ سب کو یہ بتانا چاہتا ہوں کہ پاک فوج اس وقت تک چین سے نہیں بیٹھے گی جب تک آپ کے مسائل حل نہ ہوں۔ ہم آپ سے بھی امید رکھتے ہیں کہ آپ لوگ نہ صرف ان کی باتوں میں نہیں آئینگے بلکہ ایسے ملک دشمن قوتوں کا راستہ بھی روکیں گے۔ اور پاکستان کو مضبوط کرنے میں اپنا کردار ادا کریں گے۔