لاہور میں شپنگ کمپنیوں کے 70 جعلی اکاؤنٹس سے منی لانڈرنگ کا انکشاف
لاہور(نیوزرپورٹر)ایف آئی اے نے جعلی دستاویزات پر 70 سے زائد اکاؤنٹس کھولنے کے الزام میں مختلف بینکوں میں چھاپے مار کر 5 افراد کو گرفتارکرلیا، اور ان کے قبضے سے 70 سے زائد بے نامی اکاؤنٹس کا ریکارڈ اور شپنگ کمپنیوں کے بوگس دستاویزات برآمد کرلئے،اس حوالے سے ایف آئی کے ذرائع کا کہنا ہے کہ شپنگ کمپنیوں کے جعلی اور بوگس دستاویزات پر اکاؤنٹس کھولنے کی اطلاع اور مصدقہ ثبوتوں کے بعد ایف آئی اے کی لاہور ٹیم نے گلبرگ کے مختلف بینکوں میں چھاپے مار کر آصف الرحمن، بوعلی، فرحت علی، عزیزاحمد اور خالد نامی 5 افراد کو گرفتارکرلیا، اور ان کے قبضے سے 70 سے زائد بے نامی اکاؤنٹس کا ریکارڈ اور شپنگ کمپنیوں کے بوگس دستاویزات برآمد کرلئے،ان کے بارے میں یہی بتایا جارہا ہے کہ وہ اس غیر قانونی دھندے میں ملوث ہیں۔اس حوالے سے بتایا گیا کہ ان اکاؤنٹس سے بھاری رقم ڈالر میں منتقل کر کے دوبئی اور دیگر ممالک میں منی لانڈرنگ کے ذریعے بھجوائی جارہی ہے ۔ایف آئی اے کرائم سرکل کے مطابق اس کام کے لئے شپنگ کمپنیوں کے اصل دستاویزات کی رنگین فوٹو کاپی استعمال کی جاتی رہی ہیں اور بعض ایسی بھی شپنگ کمپنیوں کے نام پر اکاؤنٹس کھولے گئے جن کا کوئی وجود ہی نہیں اکاؤنٹس میں رقم کراچی اور اسلام آباد سے بھی جمع کرائی جاتی رہی تھی اور منی لانڈرنگ میں منی چینجرز کے سہولت کار بھی ملوث ہیں۔
