لاہور (سپورٹس رپورٹر+نمائندہ سپورٹس) پاکستان فٹبال فیڈریشن کے زیراہتمام نیشنل انٹر سٹی فٹبال چیمپئن شپ اب اختتامی مرحلہ میں داخل ہوگئی ہے۔ خیبر اور اسلام آباد نے چیمپئن شپ کے فائنل میں جگہ بنا لی۔ خیبر نے فیصل آباد کو شکست دیدی۔ میچ کے پہلے ہاف کے اختتام پر خیبر کو دو صفر سے برتری حاصل تھی تاہم دوسرے ہاف میں فیصل آباد کی جانب سے واحد گول نے میچ میں تیزی پیدا کردی تاہم میچ کے اختتامی لمحات میں خیبر نے تیسرا اور فیصلہ کن گول کرکے فائنل میں جگہ پکی کرلی۔ دوسرے سیمی فائنل میں کوئٹہ اور اسلام آباد کی ٹیمیں مد مقابل ہوئیں، میچ کا وقت مکمل ہونے تک میچ بغیر کسی گول کے برابر رہا۔ ایکسٹرا ٹائم میں دونوں ٹیموں نے مخالف پوسٹوں پر حملے جاری رکھے تاہم اختتامی لمحات میں اسلام آبادنے فیصلہ کن گول سکور کرکے فائنل میں جگہ بنانے میں کامیاب رہی۔ ٹورنامنٹ کا فائنل آج ڈویژنل گراونڈ ملتان کی زینت بنے گا، صدر پاکستان فٹبال فیڈریشن انجینئر سیداشفاق حسین مہمان خصوصی ہونگے۔