سیالکوٹ: سلنڈر دھماکے میں زخمی دادی، 2پوتے اور پوتی دم توڑ گئے
سیالکوٹ+ پسرور (نامہ نگاران+ نمائندہ خصوصی) سیالکوٹ روڈ پر واقع گاؤں بھروکے میں سلنڈر پھٹنے سے زخمی ہونے والی دادی، 2پوتے اور پوتی ہسپتال میں دم توڑ گئے جبکہ والدہ پروین کی حالت نازک ہے۔ نعشیں پوسٹمارٹم کے بعد ورثاء کے حوالے کر دی گئیں۔ گزشتہ روز بھروکے گائوں میں گھس کھانا پکاتے ایل پی جی سلنڈر دھماکہ سے پھٹ گیا جس سے آگ بھڑک اٹھی تھی اور دادی ممتاز بی بی، اس کی بہو پروین، پوتی خبیبہ اور 2 پوتے عبدالباری اور علی آگ کی لپیٹ میں آکر بری طرح جھلس گئے۔ انہیں گورنمنٹ علامہ اقبال ٹیچنگ ہسپتال سیالکوٹ سے لاہور ریفرکیا گیا تھا جہاں دو سالہ علی، چھ سالہ عبدالباری، بارہ سالہ خبیبہ اور ساٹھ سالہ ممتاز بی بی دم توڑ گئے۔ ڈاکٹروں کے مطابق شدید زخمی پروین کی حالت بھی تشویشناک ہے۔ نعشیں ان کے گھر لائیں گئیں توکہرام مچ گیا اور ہر آنکھ اشکبار ہوگئی۔
