لاہور(نمائندہ سپورٹس ) قومی ٹیم کے کپتان سرفراز احمد نے انگلینڈ کے خلاف چوتھے ون ڈے میں شکست کی وجہ خراب فیلڈنگ اور کیچ چھوڑنے کو قرار دیدیا۔ٹرینٹ برج ناٹنگھم میں انگلینڈ کے خلاف چوتھے ون ڈے میں 340رنز بنا کر تین وکٹ سے ہارنے والی قومی ٹیم کے کپتان سرفراز احمد نے پریس کانفرنس میں شکست کی وجہ بتاتے ہوئے کہا کہ افسوس ہم کیچ نہیں پکڑپا رہے، فیلڈنگ میں بھی سنگین قسم کی کوتاہیاں کر رہے ہیں جس کے باعث میزبان ٹیم کے خلاف بڑا سکور کر کے بھی جیت سے دور ہیں۔اکتیس سالہ وکٹ کیپر نے کہا کہ ایسا نہیں کہ ہم اسی طرح کی فیلڈنگ کرتے ہیں، ہم نے کچھ عرصے پہلے فیلڈنگ میں عمدہ پرفارمینس کا مظاہرہ کیا تھا جو اب نہیں کر پا رہے جس کا ٹیم کی کارکردگی پر فرق پڑ رہا ہے۔سرفراز احمد نے یہ بھی تسلیم کیا کہ بائولرز کو لائن و لینتھ پر توجہ دینا ہو گی۔ محمد عامر بھی ان فٹ ہیں جس سے ایک بولر کم ہو گیا ہے البتہ انہوں نے اس تاثر کو غلط قرار دیا کہ بلے باز اپنے لئے کھیل رہے ہیں۔ انگلینڈ کے خلاف مسلسل ناکامیوں کے باوجود یہ بات حوصلہ افزا ہے کہ مسلسل تین میچوں میں ہماری ٹیم لڑتی ہوئی دکھائی دے رہی ہے، ہم نے مسلسل تین میچوں میں تین سو کا ہندسہ عبور کیا جو ایک اچھی چیز ہے۔ ہمارے بیٹس مین بڑا سکور بنا رہے ہیں تاہم کچھ غلطیاں ہیں جس کی وجہ سے ہم جیت سے دور ہیں۔39ون ڈے میچوں میں قومی ٹیم کی قیادت کرنے والے وکٹ کیپر سرفراز احمد نے کہا کہ کوشش کریں گے کہ آخری ون ڈے میں اچھا کھیلیں اور کم سے کم غلطیاں کریں۔کھلاڑیوں کے حوصلے بلند ہیں ‘انگلینڈ کے خلاف سیریز ورلڈ کپ میں کام آئے گی ۔ پاکستان اور انگلینڈ کے درمیان پانچ میچوں کی سیریز کا آخری میچ آج کھیلا جائے گا۔میچ پاکستانی وقت کے مطابق سہ پہر تین بجے شروع ہوگا۔