روم(صباح نیوز)روم ماسٹرز ٹینس کا ٹائٹل رفائیل نیڈال نے جیت لیا، فائنل میں عالمی نمبر ایک نوواک جوکووچ کو شکست ہوگئی، اسپینش کھلاڑی نویں مرتبہ یہ اعزاز حاصل کرنے میں کامیاب ہوئے ہیں۔روم میں کھیلے گئے ایونٹ کے فائنل میں رفائیل نیڈال نے نوواک جوکووچ کے خلاف جارحانہ آغاز کیا، پہلے سیٹ میں بغیر کوئی گیم ڈراپ کیے کامیابی حاصل کی۔دوسرے سیٹ میں عالمی نمبر ایک جوکووچ نے بھرپور کم بیک کیا اور چھ چار سے سیٹ جیت کر مقابلہ برابر کر دیا، تیسرے اور آخری سیٹ میں نیڈال پھر حریف پر حاوی ہوگئے۔ اور سیٹ چھ ایک سے جیتنے کے ساتھ ٹائٹل بھی اپنے نام کرنے میں کامیاب رہے۔روبرٹ فرا اور جان کیبل پر مشتمل کولمبین جوڑی نے اپنی عمدہ کارکردگی کی بدولت اٹالین اوپن ٹینس ٹورنامنٹ مینز ڈبلز فائنل ایونٹ جیت لیا۔انہوں نے فائنل میں مائیکل وینس اور راون کلاسن کو شکست دیکر ٹائٹل اپنے نام کرلیا۔ اٹلی میں جاری ایونٹ میں کھیلے گئے مینز ڈبلز فائنل میں روبرٹ فرا اور جان کیبل نے شاندار کھیل پیش کرتے ہوئے نیوزی لینڈ کے مائیکل وینس اور جنوبی افریقی جوڑی دار راون کلاسن کو سٹریٹ سیٹس میں 6-1 اور 6-3 سے ہرا کر ٹورنامنٹ جیت لیا۔ بیلاروس کی ٹینس سٹار وکٹوریہ آزارینکا اور انکی آسٹریلوی جوڑی دار ایشلی بارٹی نے اٹالین اوپن ٹینس ٹورنامنٹ کا ویمنز ڈبلز فائنل میچ جیت لیا۔انہوں نے فائنل میں جرمنی کی اینا لینا اور انکی ہالینڈ کی جوڑی دار ڈیمی سچورسکو شکست دی۔ اٹلی میں جاری ایونٹ میں کھیلے گئے ویمنز ڈبلز فائنل میں بیلاروس کی آزارینکا اور ان کی آسٹریلوی جوڑی دار ایشلی بارٹی نے شاندار کھیل پیش کرتے ہوئے جرمنی کی اینا لینا اور انکی ہالینڈ کی جوڑی دار ڈیمی سچورسکو سخت مقابلے کے بعد 4-6، 6-0 اور 10-3 سے زیر کر کے ٹائٹل جیت لیا۔