لاہور:(سپورٹس رپورٹر+نمائندہ سپورٹس ) سابق ٹیسٹ کرکٹر اعجاز احمد نے وہاب ریاض کی انٹری کو لیٹ مگر خوش آئند قرار دیتے ہوئے عامر کی شمولیت کو حیران کن قرار دیاہے۔عامر کو کوئی میچ کھیلے بغیر میگا ایونٹ میں شامل کرنے کا فیصلہ سمجھ سے باہر ہے۔اب دیکھنا یہ ہے کہ محمد عامر حریف ٹیموں کے لیے خطرہ بنتے ہیں یا پھر پاکستانی ٹیم کو ہی تہہ و بالا کرتے ہیں۔ محمد عامر ورلڈ کپ میں ساری توقعات کا مرکز ہوگا، اب سارا پریشر اس پر ہوگا، کمزور جسم اس وقت ٹوٹتا ہے جب اس پر پریشر آتا ہے، اب دیکھتے ہیں کہ وہ کس طرح ان ساری چیزوں کو لے کر چلتا ہے۔ وہاب ریاض کو پہلے ہی منتخب کرلینا چاہیے تھا، وہ انگلش وکٹوں پر ریورس سوئنگ کرنے کی اہلیت رکھتا ہے، اب جو ٹریک دیکھ رہے ہیں، ان پر وہاب ریاض سے اچھی پرفارمنس کی توقع ہے۔ ورلڈکپ میں بائولرز ہی قومی ٹیم کی ناؤ کو پار لگاسکتے ہیں۔ساری ٹیمیں بڑی اچھی تیاری کے ساتھ ورلڈکپ کھیلنے آرہی ہیں، موجودہ حالات میں تو آپ بنگلہ دیش کی ٹیم کو بھی آسان نہیں لے سکتے۔فائنل 4 میں جگہ بنانا پاکستانی ٹیم سمیت کسی کیلئے اتنا آسان نہیں ہوگا قومی ٹیم کو فٹنس ایشوز کا مزید سامنا کرنا پڑسکتاہے۔ پاکستانی ٹیم نے انگلینڈ میں اب تک 9 میچ کھیلے ہیں، ابھی 2 وارم اپ میچ مزید کھیلنا ہے، پھر ورلڈکپ کا سفر شروع ہوگا، اگر خدانخواستہ پاکستان کے 2 یا 3 اہم کھلاڑی ان فٹ ہوگئے تو پھر کہانی ختم ہوجائے گی۔ اگر پاکستانی ٹیم کی فٹنس بہتر رہے گی تو پھر اچھے نتائج سامنے آسکتے ہیں۔ لیگ سپنر شاداب خان کی واپسی سے بائولنگ کمبی نیشن مضبوط ہواہے، عماد وسیم کا بال گھومتا نہیں، وہ رنز روکنے میں موثر رہتا ہے لیکن وکٹ زیادہ نہیں لے پاتا، ہمیں رنز روکنے سے زیادہ ایسے سپنر کی تلاش کرنی چاہیے جو جارحانہ بائولنگ سے وکٹیں لے کر ٹیم کی پوزیشن کو مضبوط بنانے میں مدد دے۔