لاہور(سپورٹس رپورٹر+نمائندہ سپورٹس )چیف سلیکٹر انضمام الحق نے پاکستان کی آل ٹائم ورلڈ کپ الیون کے انتخاب کو مشکل ٹاسک قرار دیتے ہوئے کہا کہ پاکستان کی مٹی بہت زرخیز ہے، ہماری کرکٹ میں بہت بڑے نام موجود ہیں جنہوں نے اپنے دور میں بہت نام کمایا ،اب ان میں سے چند کا انتخاب کرنا آسان نہیں۔ 13 نام تجویز کیے اور عمران خان کو کپتان چنا، اوپنرز میں ماجد خان، سعید انور کیساتھ شرجیل خان کو شامل کیا ہے۔ مڈل آرڈر میں انضمام نے ظہیر عباس، جاوید میانداد اور محمدیوسف کو منتخب کیا ہے، پرفارمنس کے اعتبار سے ان کی خود کی بھی اس ٹیم میں جگہ بنتی ہے لیکن دوسروں کو ترجیح دیتا ہوں۔فاسٹ بائولرز میں عمران خان، وسیم اکرم، وقاریونس کیساتھ شعیب اختر ٹیم کا حصہ ہیں۔ سپن بائولنگ میں ثقلین مشتاق اور شاہد آفریدی کو فہرست میں درج کروں گا۔ وکٹ کیپنگ میں وسیم باری، معین خان ، راشد لطیف کی بڑی خدمات ہیں لیکن میری چوائس کامران اکمل ہیں۔ اس کی موجودگی سے بیٹنگ کو بہت سہارا ملتاہے۔ پاکستان میں ایک سے بڑھ کر ایک کرکٹر ہے۔ جن کے نام نہیں لے سکے ان سے پیشگی معذرت چاہتے ہیں۔