لاہور(سپورٹس رپورٹر+نمائندہ سپورٹس )قومی کرکٹ ٹیم کے سابق کپتان و کوچ وقار یونس کا کہنا ہے کہ پاکستان کر کٹ ٹیم میں جو پریشر برداشت کرگیا وہ عظیم کھلاڑیوں کی فہرست میں آجائے گا۔ پلیئرز کو پریشر سے ڈیل کرنا سیکھنا ہوگا عدم تسلسل کا ٹیگ ایک بار پھر پاکستان ٹیم کے ساتھ لگ گیا ہے،عدم تسلسل کا مسئلہ سسٹم کی وجہ سے ہے، نوجوان پلیئرز بغیر سسٹم کے ٹیم میں آتے ہیں۔ پاکستان کی پچھلے دو میچز میں کارکردگی ایک دوسرے کے برعکس رہی ہے، پاکستان ٹیم ہمیشہ ایسے ہی پرفارم کرتی رہی ہے۔ ٹورنامنٹ میں کسی بھی ٹیم کو آسان لینا غلط ہوگا۔وقار یونس نے کہا کہ خراب آغاز کے بعد شاندار فتح سے ٹیم کے حوصلے بلند ہوئے ہوں گے، سری لنکا کے لاستھ ملنگا نے بتادیا ہے کہ اب بھی اس میں دم ہے۔انہوں نے کہا کہ آسٹریلیا اور بھارت جیسی مضبوط ٹیموں کیخلاف میچ سے قبل سری لنکا سے جیت ضروری ہے۔