لاہور (سپورٹس رپورٹر+نمائندہ سپورٹس) فیم ایف سی نے میزبان ٹاون شپ ایف سی کو تین ایک سے شکست دے کر پہلا ٹاون شپ رمضان المبارک فلڈ لائٹ فٹ بال ٹورنامنٹ جیت لیا۔ ٹاون شپ میں کھیلے گئے فائنل میچ میں فیم ایف سی کی ٹیم چھائی رہی اور ٹاون شپ ایف سی کو پہلے ہی ہاف میں تین گول داغ کر ٹرافی اپنے نام کرلی۔فیم ایف سی کی جانب سے احسن نے 18 ویں منٹ میں گول کرکے اپنی ٹیم کو برتری دلائی۔عاقب میسی نے 25 ویں منٹ میں گول کرکے فیم فٹ بال کی برتری دو صفر کردی۔ دو منٹ بعد ہی عمید نے گول کرکے فیم ایف سی کی برتری تین صفر کردی۔ میچ کے دوسرے ہاف میں ٹاون شپ ایف نے ایک گول کر کے فیم ایف سی کی برتری کم کی لیکن اس وقت بہت دیر ہوچکی تھی۔ اس طرح فیم ایف سی نے فائنل میچ ایک کے مقابلے تین گول سے جیت کرکے خوبصورت ٹرافی اپنے نام کی۔ٹورنامنٹ انتظامیہ کی جانب سے فیم ایف سی کو نقد انعامات سے بھی نوازا گیا۔ فیم ایف سی کی فتح پر صدر ضیاء عارف ڈوگر نے بھی کھلاڑیوں میں نقد انعامات تقسیم کئے۔