مظفر گڑھ : نہر میں 60 فٹ چوڑا شگاف،وسیع زرعی اراضی زیرآب
مظفر گڑھ(آئی این پی)پنجاب کے شہر مظفر گڑھ کی ٹو ایل خان پور نہر میں 60 فٹ سے زائد چوڑا شگاف پڑ گیا ہے، شگاف پڑنے سے درجنوں ایکڑ زرعی اراضی زیر آب آ گئی،شگاف پڑنے کا واقعہ مظفرگڑھ کے علاقے سلطان کالونی کے قریب ٹو ایل خانپور نہر میں پیش آیا۔تفصیلات کے مطا بق نہر میں پڑنے والا شگاف 60 فٹ سے زیادہ چوڑا ہے، جس کے باعث درجنوں ایکڑ زرعی اراضی اور فصلیں زیرِ آب آ گئی ہیں۔مقامی افراد کا کہنا ہے کہ بااثر افراد کی جانب سے محکمہ انہار کے عملے کی ملی بھگت سے ٹو ایل خانپور نہر سے پانی چوری کیا جاتا تھا، جس کے باعث کنارے کمزور ہوگئے اور نہر میں شگاف پڑ گیا۔علی الصبح پڑنے والے شگاف کو پر کرنے کے لیے امدادی ٹیمیں نہ پہنچنے پر اہل علاقہ نے محکمہ انہار کے خلاف احتجاج بھی کیا ہے۔
