لاہور (نوائے وقت رپورٹ) مسلم لیگ ن کے رہنما رانا ثناء اللہ نے فردوس عاشق اعوان کے بیان پر ردعمل میں کہا ہے فردوس باجی آپ نے صحیح کہا عوام دشمن بجٹ کے بعد عوام کی چیخیں بھی نکلیں اور آرام بھی آگیا۔ عمران نیازی عوام کو 15 سال سے گالیاں دے رہے ہیں اب بس اعلیٰ سطح انکوائری کمشن میں پی ٹی آئی کے 18 جعلی اکائونٹس کا حساب بھی دیدیں، بغض سے بھری دھمکی آمیز گفتگو اب ہر روز بھی کریں عوام دشمن بجٹ پاس نہیں ہونے دیں گے۔ ہم ایک ایک پیسے کا جواب دیں گے آپ صرف سرکاری بسوں اور دوائیوں کا حساب دے دیں۔ فردوس باجی جتنا شور مچا لیں دس مہینوں میں 5 ہزار روپے کے قرضے کا جواب دینا پڑے گا۔ وزیراعظم سے روز رات 12 بجے قوم سے خطاب کرائیں پھر بھی نالائقی نہیں چھپ سکتی۔ فردوس باجی عوام کو بتائیں عمران صاحب کس حساب سے ڈیڑھ لاکھ روپے ٹیکس دیتے ہیں۔ عمران خان کو بیرون ملک بیٹوں اور بیٹی کے اثاثے الیکشن کمشن کے گوشوارے میں ڈیکلیئر کرنے ہوں گے۔