پشاور+ لاہور (نوائے وقت رپورٹ + نیوز ایجنسیاں) سی ٹی ڈی نے کارروائی کرکے ملتان میں 2 دہشتگرد ہلاک کر دیئے جبکہ 3 فرار ہو گئے۔ پشاور میں ایک دہشتگرد کو اسلحے سمیت گرفتار کر لیا۔ تفصیلات کے مطابق پشاور میں سی ٹی ڈی نے جنرل بس سٹینڈ پر کارروائی کرتے ہوئے کالعدم دہشت گرد تنظیم کے دہشتگرد کو گرفتار کر لیا۔ ملزم کی گرفتاری پر 5 لاکھ روپے انعامی رقم تھی۔ ملزم متنی پولیس پر حملے میں ملوث تھا۔ حساس اداروں نے کشن گڑھ روڈ پر کارروائی کر کے دہشت گردی کی نیت سے چھپائے گئے 29 مارٹر گولے برآمد کئے۔ دریں اثناء سی ٹی ڈی نے ملتان میں کارروائی کر کے 2 دہشتگردوں کو ہلاک کر دیا جبکہ ان کے 3 ساتھی فرار ہو گئے۔ سی ٹی ڈی ترجمان کے مطابق ہلاک دہشتگردوں کا تعلق کالعدم تنظیم سے تھا۔ ہلاک دہشتگردوں کے قبضے سے دھماکہ خیز مواد‘ اسلحہ‘ نقشے اور رقم برآمد ہوئی ہے۔ دونوں دہشتگرد 3 سرکاری افسران کے اغوا سمیت مختلف وارداتوں میں بھی ملوث تھے۔