ٹیکسلا (صباح نیوز) ٹیکسلا میں اپنی بیٹی کو زیادتی سے بچاتے ہوئے ماں اپنی جان گنوا بیٹھی۔ ذرائع کے مطابق ٹیکسلا کے قریب گائوں جلیا میں نامعلوم شخص دیوار پھلانگ کر گھر میں داخل ہوا اور وہاں موجود ایک شادی شدہ خاتون کے ساتھ زیادتی کی کوشش کی۔ خاتون اپنے سسرال والوں سے اختلافات بڑھ جانے کی وجہ سے واپس اپنی والدہ کے گھر پر رہنے آئی ہوئی تھی۔ ملزم نے خاتون سے زیادتی کرنے کی کوشش کی تو اس نے چیخ و پکار شروع کردی جس کے نتیجے میں خاتون کی والدہ اسے بچانے کے لیے آئی، لیکن ملزم نے اس پر چاقو سے حملہ کرکے اسے شدید زخمی کردیا۔ حملہ آور والدہ اور بیٹی کو بھی زخمی کرکے فرار ہوگیا۔ زخمی خواتین کو تحصیل ہیڈکوارٹرز (ٹی ایچ کیو) ہسپتال ہزرو پہنچایا گیا جہاں والدہ جان کی بازی ہار گئی۔ پولیس نے مشتبہ شخص کے خلاف قتل کا مقدمہ درج کرکے اسے گرفتار کرلیا۔