لاہور (نمائندہ سپورٹس)کرکٹ ورلڈکپ سے باہر ہونے کے بعد قومی ٹیم کے کھلاڑی وطن واپس پہنچ گئے۔کرکٹرز الگ الگ پروازوں کے ذریعے لندن سے پاکستان پہنچے جس کے بعد وہ نجی گاڑیوں میں ائیرپورٹ سے اپنے اپنے گھر روانہ ہوگئے۔ بابر اعظم، امام الحق اور آصف علی لاہور پہنچ گئے ہیں۔پی سی بی کی جانب سے ائیرپورٹ پر کھلاڑیوں کا استقبال کرنے کے لیے خصوصی طور پر کوئی موجود نہیں تھا۔اس موقع پر کسی ناخوشگوار واقعے سے نمٹنے کے لیے پولیس نے کھلاڑیوں کو سکیورٹی حصار میں لیے رکھا تھا۔اوپننگ بلے باز فخر زمان، شاہین شاہ آفریدی، شاداب خان اور عماد وسیم بھی اسلام آباد پہنچ گئے ہیں۔شاداب خان اور عماد وسیم آج راولپنڈی میں صحافیوں سے گفتگو کریں گے۔