قاہرہ( آن لائن )الجیریا کی ٹیم افریقہ کپ آف نیشنز فٹ بال ٹورنامنٹ کے کوارٹر فائنل میں پہنچ گئی۔ الجیریا کی ٹیم نے پری کوارٹر فائنل میچ میں گنی کی ٹیم کو یکطرفہ مقابلے کے بعد 3-0 گول سے ہرا کر ٹورنامنٹ کے ٹاپ ایٹ کے لئے کوالیفائی کرلیا۔مصر میں جاری ایونٹ میں کھیلے گئے پری کوارٹر فائنل میچ میں الجیریا اور گنی کی ٹیمیں آمنے سامنے تھیں جس میں الجیریا کی ٹیم نے شاندار کارکردگی کا مظاہرہ کرتے ہوئے گنی کی ٹیم کو یکطرفہ مقابلے کے بعد 3-0 گول سے شکست دیکر افریقہ کپ آف نیشنز فٹ بال ٹورنامنٹ کے کوارٹر فائنل کے لئے کوالیفائی کرلیا۔گنی کی ٹیم بالکل بے بس نظر آئی اور کوئی بھی گول کرنے میں کامیاب نہ ہوسکی۔ الجیریا کی طرف سے محمد یوسف بلالی نے میچ کے 24ویں منٹ میں گول کیا، الجیریا کی طرف سے دوسرا گول ریاد کریم نے میچ کے 57 ویں منٹ میں سکور کر کے اپنی ٹیم کو گنی کے خلاف 2-0 کی برتری دلادی۔ الجیریا کی طرف سے تیسرا گول ادم اونس نے میچ کے 82 ویں منٹ میں سکور کیا اور تینوں کھلاڑیوں نے اپنی ٹیم کی فتح میں اہم کردار ادا کیا۔