لاہور (سپورٹس رپورٹر+نمائندہ سپورٹس) پاکستان اور سری لنکا نے چودھویں ویسٹ ایشیا بیس بال کپ کے سیمی فائنلز میں قدم جمالئے۔ سیمی فائنل کے مرحلے میں گرین شرٹس کا مقابلہ روایتی حریف بھارت سے ہو گا جہاں قومی ٹیم جیت کا عزم لیے بھارتی ٹیم سے ٹکرائے گی جبکہ سری لنکا کا مقابلہ ایران سے ہو گا۔اس سے قبل ٹورنامنٹ کے دوسرے دن پاکستان نے بنگلہ دیش کو 0-17 رنز سے شکست دی تھی۔ پاکستان نے پہلی اننگز میں ہی 8 رنز کی برتری حاصل کر کے میچ پر گرفت مضبوط کر لی تھی۔ عبیداللہ، محمد عبداللہ، محمد امین، ارسلان، اسد، صادق آفریدی، فضل نے 2-2 جبکہ محمد رفیع، سمیر زوار اور عمیر نے1-1 رن بنایا جبکہ سری لنکن ٹیم نے نیپال کو آؤٹ کلاس کرتے ہوئے 0-18 رنز سے ہرایا۔کولمبو میں ٹیم کے ہمراہ موجود صدر پاکستان فیڈریشن بیس بال و ممبر ایٹ لارج بیس بال فیڈریشن آف ایشیا سید فخر علی شاہ نے امید ظاہر کی کہ سیمی فائنل اور پھر فائنل میں کامیابی حاصل کرکے کپ جیتیں گے۔