آسٹریلیا2019-20 ء میں پاکستان، سری لنکا‘ نیوزی لینڈ کی میزبانی کریگا
لاہور(سپورٹس رپورٹر )آسٹریلیا کی مینز کرکٹ ٹیم 2019-20 سیزن کیلئے پاکستان، سری لنکا اور نیوزی لینڈ کے خلاف ہوم سیریز کھیلے گی جبکہ ویمنز ٹیم سری لنکا، بھارت اور انگلینڈ کے خلاف سیریز کی میزبانی کریگی۔ کرکٹ آسٹریلیا کے 2019-20 سیزن کے ہوم سیریز کے شیڈول کے مطابق آسٹریلوی مینز ٹیم پاکستان، سری لنکا اور نیوزی لینڈ کیخلاف سیریز میں میزبان ہوگی جبکہ ویمنز ٹیم سری لنکا، بھارت اور انگلینڈ کے خلاف سیریز کی میزبانی کریگی۔یوم آسٹریلیا کے موقع پر کوئی بھی انٹرنیشنل میچ نہیں کھیلا جائے گا اور یہ جنوری 1994 کے بعد پہلا موقع ہے کہ یوم آسٹریلیا پر کوئی میچ نہیں رکھا گیا۔ شیڈول کے تحت آسٹریلیا کی مینز اینڈ ویمنز ٹیمیں 2019-20 سیزن میں ورلڈ ٹی ٹونٹی کپ ٹورنامنٹس کے علاوہ اپنی سرزمین پر 28انٹرنیشنل میچز کھیلیں گی۔سیزن کے دوران آسٹریلوی مینز ٹیم پاکستان، سری لنکا اور نیوزی لینڈ کے خلاف سیریز کھیلے گی جبکہ آسٹریلوی ویمنز ٹیم انگلینڈ، بھارت اور سری لنکا کیخلاف ایکشن میں نظر آئیگی۔سیزن کے دوران آسٹریلوی مینز ٹیم دو ڈے اینڈ نائٹ ٹیسٹ بھی کھیلے گی اور 30 برس بعد نیوزی لینڈ کیخلاف باکسنگ ڈے ٹیسٹ میں صلاحیتوں کے جوہر دکھائیگی۔ آسٹریلوی مینز ٹیم اکتوبر میں سری لنکا کے خلاف تین ٹی ٹونٹی میچوں کی سیریز کھیلے گی۔ دونوں ٹیموں کے درمیان پہلا میچ 27 اکتوبر، دوسرا میچ 30 اکتوبر جبکہ تیسرا اور آخری میچ یکم نومبر کو کھیلا جائیگا۔ پاکستان کیخلاف تین ٹی ٹونٹی اور دو ٹیسٹ میچز کی میزبانی کریگی۔دونوں ٹیموں کے درمیان پہلا ٹی ٹونٹی میچ 3 نومبر، دوسرا میچ 5 نومبر جبکہ تیسرا اور آخری میچ 8 نومبر کو شیڈول ہے۔ پہلا ٹیسٹ میچ 21 سے 25 نومبر جبکہ دوسرا اور آخری ٹیسٹ میچ 29 نومبر سے 3 دسمبر تک کھیلا جائیگا۔ آسٹریلیا اور نیوزی لینڈ کے درمیان تین ٹیسٹ میچوں پر مشتمل سیریز کا پہلا میچ 12 سے 16 دسمبر، دوسرا میچ 26 سے 30 دسمبر جبکہ تیسرا اور آخری ٹیسٹ میچ 3 سے 7 جنوری تک کھیلا جائیگا۔ آسٹریلوی ٹیم مارچ میں نیوزی لینڈ کیخلاف تین ایک روزہ بین الاقوامی میچوں کی سیریز کی میزبانی کریگی۔ دونوں ٹیموں کے درمیان پہلا میچ 13 مارچ، دوسرا 15 مارچ جبکہ تیسرا اور آخری میچ 20 مارچ کو کھیلا جائیگا۔ آسٹریلوی ویمنز ٹیم ستمبر اور اکتوبر میں سری لنکا کیخلاف تین ٹی ٹونٹی اور تین ایک روزہ میچوں کی سیریز کھیلے گی۔ اس کے بعد آسٹریلوی ویمن ٹیم جنوری فروری میں انگلینڈ اور بھارت کے خلاف سہ ملکی سیریز کھیلے گی۔
