لاہور(سپورٹس رپورٹر+نمائندہ سپورٹس) پاکستان کرکٹ بورڈ نے متوقع ڈومیسٹک کرکٹ سٹرکچر کے تحت سینئر و جونیئر ٹیموں کی تشکیل پر کام شروع کر دیا ہے۔ ذرائع کے مطابق نیشنل کرکٹ اکیڈمی میں سابق سلیکٹرز توصیف احمد ، وسیم حیدر اور وجاہت اللہ واسطی سمیت کوچز کا اجلاس طلب کرلیا گیا۔ اجلاس میں انڈر 19 کیلئے چھ صوبائی ٹیموں کے لئے کھلاڑیوں کو شارٹ لسٹ کیا جائیگا۔ چھ ڈویژن ٹو انڈر 19 ٹیموں کے لئے بھی کھلاڑی شارٹ لسٹ کئے جائیں گے۔ قائد اعظم ٹرافی فرسٹ کلاس اور نان فرسٹ کلاس کے لئے بھی چھ چھ صوبائی ٹیموں کے لئے بھی کھلاڑی شارٹ لسٹ کئے جائیں گے۔ قومی ون ڈے اور ٹی ٹونٹی ٹورنامنٹ کیلئے بھی کھلاڑیوں کے نام شارٹ لسٹ ہوں گے۔ صوبائی ٹیموں کا اعلان پی سی بی کے نئے آئین کی منظوری کیساتھ ہی کردیا جائیگا۔ کھلاڑیوں کا انتخاب گذشتہ برس ہونیوالے ڈومیسٹک ٹورنامنٹس میں کارکردگی کی بنیاد پر کیا جائیگا۔ انڈر 19 ٹیموں کیلئے ریجنل اکیڈمیز بھی بہترین کھلاڑیوں کو شارٹ لسٹ کیا جائیگا۔