چمن، حجرہ شاہ مقیم، ٹھٹہ (نوائے وقت رپورٹ، نامہ نگار، صباح نیوز) مختلف شہر میں ہونیوالے ٹریفک حادثات میں دو بھائیوں سمیت 8 افراد جاںبحق ہو گئے جبکہ دو افراد زخمی ہو گئے۔ زخمیوں اور جاں بحق افراد کو مقامی ہسپتال میں داخل کرا دیا گیا۔ چمن میں ٹریفک حادثے میں چار افراد جاں بحق ہو گئے۔ لیویز ذرائع کے مطابق جنگل پیر علیزئی کے قریب مسافر کوچ اور گاڑی میں ٹکر ہو گئی حادثے میں چار افراد جاںبحق ایک زخمی ہو گیا ۔ حجرہ شاہ مقیم میں چوک حجرہ دیپالپور قصور روڈ پر کار اور رکشہ کی ٹکر دو افراد جاں بحق جبکہ ساتھی خواجہ سراء شدید زخمی ہسپتال منتقل کر دیا گیا ۔ تفصیلات کیمطابق محلہ شاہ میر کے رہائشی محنت کش میر عالم مجاہد علی ولد خدایا اور اس کا بھائی فقیر حسین جو کہ مختلف گھروں میں ودھائی لینے کیلئے جاتے تھے اور ان کے ساتھ ایک خواجہ سراء تھا جس کا نام صاحبہ تھا۔ آج صبح سویرے رکشہ پر بیٹھ کر دونوں بھائی ودھائی لینے کیلئے جار ہے تھے کہ حجرہ شاہ مقیم چوک دیپالپور قصور روڈ پر تیز رفتار ہنڈاکار رکشہ کے ساتھ ٹکرا گئی جس کے نتیجہ میں مجاہد علی اور فقیرحسین دونوں موقع پر جاں بحق ہو گئے مرنے والے دونوں حقیقی بھائی تھے۔ جو کہ طبلہ نواز تھے خوفناک حادثہ میں خواجہ سراء صاحبہ شدید زخمی ہو گیا جسے ہسپتال منتقل کر دیا گیا۔ ٹھٹھہ میں ٹرک کی موٹرسائیکل کو ٹکر سے دو افرا جاں بحق ہو گئے۔ تفصیلات کے مطابق ٹھٹھہ میں دھابیجی کے قریب ٹرک نے موٹرسائیکل کو ٹکر مار دی ہے حادثے کے نتیجے میں دو موٹرسائیکل سوار جاں بحق ہو گئے۔ حادثے کی اطلاع ملنے پر ریسکیو اہلکاروں نے موقع پر پہنچ کر لاشوں کو شناخت کیلئے سول ہسپتال منتقل کر دیا ہے۔