لاہور(سپورٹس رپورٹر+نمائندہ سپورٹس) پاکستان کرکٹ بورڈ نے کوچنگ سٹاف کی تقرری کیلئے اشتہار جاری کر دیا۔ خواہشمند امیدوار 23 اگست تک درخواستیں جمع کروا سکتے ہیں۔ پی سی بی نے قومی ٹیم کے کوچز کی تلاش شروع کر دی، ہیڈ کوچ، بیٹنگ کوچ اور باؤلنگ کوچ جبکہ نئے قائم ہونیوالے عہدہ اسٹرینتھ اینڈ کنڈیشننگ کوچ کیلئے بھی اشتہار دیا گیا ہے۔ ہیڈ کوچ کیلئے لیول ٹو کوچنگ کورس، تین سالہ تجربہ، ٹیسٹ یا انٹرنیشنل کرکٹر جبکہ فرسٹ کلاس میں دس سالہ تجربہ رکھنے والے افراد بھی اپلائی کر سکتے ہیں۔ بیٹنگ اور باولنگ کوچ کیلئے لیول ٹو کورس کیساتھ تین سالہ تجربہ درکار ہے، اسٹرینتھ اینڈ کنڈیشننگ کوچ کیلئے سپورٹس میڈیسن، سپورٹس سائنسز یا فیزیکل ایجوکیشن میں بیچلر ڈگری مانگنے کی ساتھ ساتھ تین سال کا تجربہ بھی مانگا گیا ہے۔