شیخوپورہ+ فیروزوالہ+ جوئیانوالا (نمائندہ نوائے وقت+ نامہ نگار) لاہور شیخوپورہ روڈ کی آبادی گارڈن ٹاون (قلعہ ستارشاہ) میں دو منزلہ مکان کی چھت گرنے سے بہن بھائی سمیت تین افراد ہلاک اور ایک نوجوان شدیدزخمی ہو گیا۔ بتایا گیا ہے کہ گارڈن ٹائون کے رہائشی محمد اشفاق کے ہاں عید منانے کیلئے اسکی نواسی اور سالے کے بچے فیصل آباد سے آئے ہوئے تھے جو پہلی منزل کے کمرے میں سو رہے تھے کہ بوسیدہ مکان کی بالائی منزل پہلی منزل پر آگری جس کے نتیجہ میں کمرے میں سوئے ہوئے چار افراد ملبے تلے آکر دب گئے۔ مقامی لوگوں اور ریسکیو کے عملہ نے جدوجہد کرکے ملبہ ہٹایا جس کے نتیجہ میں چودہ سالہ علی حیدر اور اسکی چار سالہ بہن لائبہ انکی ماموں زاد بیٹی طیبہ دس سالہ زخموں کی تاب نہ لاتے ہوئے دم توڑ گئے۔ جبکہ محمد عرفان کو زخمی حالت میں ملبہ سے نکال کر طبی امداد کیلئے ہسپتال داخل کرا دیا گیا۔ فیکٹری ایریا پولیس نے جاں بحق ہونیوالے تینوں افراد کی نعشیں ضروری کارروائی کے بعد ورثا کے حوالے کردی ۔