لاہور(نمائندہ سپورٹس) قومی کرکٹ ٹیم کے سابق منیجر معروف کرکٹ آرگنائزر اظہر زیدی کا کہنا ہے علیم ڈار پاکستان کا فخر ہیں۔ وہ ایک عرصے سے بین الاقوامی سطح پر کرکٹ میں انصاف کے شعبے میں پاکستان کا نام روشن کر رہے ہیں۔ حال ہی میں انہوں نے ایک اور عالمی اعزاز حاصل کیا ہے۔ پی اینڈ ٹی جمخانہ کی طرف سے روایتی انداز میں علیم ڈار کے اعزاز میں تقریب کا انعقاد آئندہ ہفتے کیا جائے گا۔ اظہر زیدی کا کہنا تھا کہ علیم ڈار نے امپائرنگ میں جس طرح پاکستان اور پی اینڈ ٹی جمخانہ کا نام روشن کیا ہے اس کی جتنی بھی پذیرائی کی جاے وہ کم ہے۔ تقریب ایل سی سی اے گراونڈ میں کلب کے نیٹ پر ہوگی، کلب کے پیٹرن خالد محمود، وائس چیئرمین محمد امین، عاشق قریشی، سلمان کاظمی، ٹیسٹ کرکٹر عبدالرزاق , عمران نذیر ، عامر نذیر، طارق رشید ، محمد وقاص، آئی سی سی امپائر احسن رضا، میچ ریفری عزیز ملک اور کلب سے وابستہ کرکٹرز شریک ہونگے۔