لاہور (سپورٹس رپورٹر+نمائندہ سپورٹس)آئی سی سی ورلڈ ٹیسٹ چیمپئن شپ میں دیمتھ کرونارتنے کی شاندار سنچری کی بدولت سری لنکا نے نیوزی لینڈ کو پہلے ٹیسٹ میچ میں 6 وکٹوں سے شکست دے کر 60 پوائنٹس حاصل کر لئے، فاتح ٹیم نے 268 رنز کا ہدف میچ کے آخری روز اپنی دوسری اننگز میں 4 وکٹوں کے نقصان پر حاصل کیا، کپتان دیمتھ کرونارتنے اور لاہیرو تھریمانے نے شاندار بلے بازی کا مظاہرہ کرتے ہوئے ٹیم کو 161 رنز کا جاندار آغاز فراہم کر کے اس کی جیت کی بنیاد رکھی، تھریمانے 64 رنز بنا کر آئوٹ ہو گئے لیکن کرونارتنے نے ڈٹ کر کیویز بائولرز کا مقابلہ کیا اور 122 رنز کی دلکش اننگز کھیل کر ٹیم کو فتح دلوائی، انہیں عمدہ بلے بازی کا مظاہرہ کرنے پر میچ کے بہترین کھلاڑی کا ایوارڈ دیا گیا۔ اتوار کو گال ٹیسٹ کے پانچویں اور آخری روز سری لنکن ٹیم نے 133 رنز بغیر کسی وکٹ کے نقصان پر دوسری ادھوری اننگز دوبارہ شروع کی تو اسے کامیابی کیلئے مزید 135 رنز درکار تھے میتھیوز اور دھنن جایا ڈی سلوا نے بالترتیب 28 اور 14 ناقابل شکست رنز بنا کر ٹیم کو فتح دلوائی۔ بولٹ، سائوتھی، سومر ویلی اور اعجاز پٹیل نے ایک، ایک وکٹ لی۔