لاہور(سپورٹس رپورٹر+نمائندہ سپورٹس) سری لنکا کے ساتھ ون ڈے اور ٹی 20 سیریز کے انتظامات کا جائزہ لینے کے لیے کوارڈی نیشن کمیٹی کا اہم اجلاس بدھ کو لاہور میں طلب کیا گیا ہے۔وسیم خان کی صدارت میں ہونے والے اجلاس مہمان ٹیم کے سکیورٹی انتظامات سمیت ہر ڈیپارٹمنٹ اپنی تیاریوں پر بریفنگ دے گا اور مختلف تجاویز پر مشاورت ہوگی۔ شائقین کرکٹ کے لیے ٹکٹوں کی فروخت کب شروع ہوگی، ٹکٹ کی قیمت کیا رکھی جائے، اس پر بھی حتمی فیصلہ آج ہونے والے جلاس میں ہی متوقع ہے۔ذرائع کے مطابق مہمان ٹیم کو صدارتی لیول کی سکیورٹی فراہم کی جائے گی، سری لنکن ٹیم کی 25 ستمبر کو کراچی آمد متوقع ہے، اگلے روز دونوں ٹیموں کے کھلاڑی نیشنل سٹیڈیم میں پریکٹس کریں گے۔ دونوں ٹیموں کے کپتان بھی 26 ستمبر کو پریس کانفرنس کریں گے۔ 27 ستمبر کو نیشنل سٹیڈیم کراچی میں پاکستان اور سری لنکا کے درمیان پہلا ون ڈے میچ کھیلاجائے گا دوسرا ون ڈے میچ 29 اور تیسرا 2 اکتوبر کو رکھا گیا ہے۔3 اکتوبر کو دونوں ٹیمیں لاہور کی اڑان بھریں گے، 4 اکتوبر کو پریکٹس سیشن طے کیا جارہاہے، قذافی سٹیڈیم میں 5 اکتوبر کو پہلے ٹی ٹونٹی کا میلہ سجے گا۔ 7 اکتوبر کو دوسرا جبکہ 9 اکتوبر کو تیسرا ٹی ٹونٹی میں سری لنکن اور پاکستانی سٹارز ایکشن میں دکھائی دیں گے۔