انڈر15 بیڈمنٹن تربیتی کیمپ ٹیلنٹ کی کمی نہیں : کوچ لیاقت علی
لاہور(سپورٹس رپورٹر) پاکستان سپورٹس بورڈ کے لاہور میں واقع کوچنگ سنٹر میں انڈر15 بوائز اینڈ گرلز کیلئے بیڈمنٹن تربیتی کیمپ لگا دیا گیا ہے۔ پاکستان کے انٹرنیشنل بیڈمنٹن کوچ لیاقت علی کیمپ میں کھلاڑیوں کو ٹریننگ دینگے۔ ایسے نوجوان کھلاڑی جو مستقبل میں پاکستان کی بیڈمنٹن میں نمائندگی کرنا چاہتے ہیں انہیں تربیتی کیمپ میں تربیت دی جائیگی۔ انٹرنیشنل بیڈمنٹن کوچ لیاقت علی کا کہنا تھا کہ پاکستان میں ٹیلنٹ کی کمی نہیں‘ کوشش ہوگی کہ کیمپ سے ایسے بچے اور بچیوں کو تلاش کیا جائے جو مستقبل میں پاکستان کی بین الاقوامی سطح پر نمائندگی کر سکیں۔ تربیتی کیمپ کو کھلاڑیوں کی سہولت کے مطابق ترتیب دیا جائیگا، تربیتی کیمپ 24 گھنٹے جاری رہا کریگا جو کھلاڑی بھی اپنی سہولت کے مطابق ٹائم لے گا اسے اسی ٹائم ٹیبل کے تحت تربیت دی جائیگی۔
