کراچی‘ ٹھٹھہ،کوئٹہ (نوائے وقت رپورٹ،بیورو رپورٹ) حب ندی اور کینجھر جھیل میں ڈوب کر سات افراد جاں بحق ہو گئے۔ پولیس کے مطابق حب ندی میں ڈوب کر ایک ہی خاندان کے 5 افراد جاں بحق ہو گئے۔ چار افراد کی لاشیں نکال لی گئیں۔ دس سالہ بچے کی تلاش جاری ہے۔ جاں بحق افراد میں ایک خاتون ‘ تین بچے شامل ہیں۔ ٹھٹھہ میں بھی کینجھر جھیل میں ڈوب کر دو نوجوان جاں بحق ہو گئے۔ دونوں نوجوان مچھلی کے شکار کیلئے آئے تھے کہ ڈوب کر جاں بحق ہو گئے۔ ایس ایچ او ساکران کے مطابق ندی میں ڈوب کر جاں بحق ہونے والوں میں 34 سالہ خاتون‘ 13 سالہ اور 4 سالہ دو لڑکیاں ایک 10 سالہ بچہ اور ایک 20 سے 28 سالہ مرد شامل ہے۔ خیال رہے کہ متاثرہ خاندان کا تعلق کراچی کے علاقے اورنگی ٹاؤن میں خیر آباد سے تھا جو پکنک منانے کے لئے حب ندی آئے تھے۔