اداکار عابد علی سپردخاک، بیٹی کا سوتیلی والدہ پر میت لے جانے کا الزام
کراچی (وقائع نگار) نامور فنکار و صداکار عابد علی کو سینکڑوں سوگواروں کی آہوں اور سسکیوں میں بحریہ ٹائون کے قبرستان میں سپرد خاک کردیا گیا۔ مرحوم کی نماز جنازہ مسجد عاشق بحریہ ٹائون میں ادا کی گئی جس میں اداکار قوی خان، شہزاد رضا، تنویر جمال، فہد مصطفی، ساحر لودھی، دانش نواز، عمیر لغاری، عجب گل، اسلم شیخ، عمران رضا ودیگر فنکاروں اور عزیز واقارب نے شرکت کی۔ عابد علی کی پہلی بیوی حمیرا علی کی بیٹیوں ماڈل ایمان علی، راحمہ علی اپنے والد کا دیدار کرنے کے لئے نمازہ جنازہ کے موقع پر دیگر خواتین کے ہمراہ مسجد میں موجود تھیں۔ اداکار عابد علی کی بیٹی راحمہ علی نے سوتیلی والدہ اداکارہ رابعہ نورین پر والد کی میت کو بغیر اجازت ہسپتال سے لے جانے کا الزام لگا دیا۔
