جڑانوالہ (نمائندہ نوائے وقت) المناک سانحہ میں 2بھائی اورکزن دم گھٹنے سے جاں بحق ہوگئے۔ دونوں بھائی اپنے کزن کے ساتھ ڈیرہ غازی خان کے علاقہ میں روزگار کیلئے مقیم تھے۔ گزشتہ روز پائپ لائنوں میں صفائی کے لیے اترتے ہی گیس کی وجہ سے دم گھٹ گیا اور موت واقع ہوگئی۔ میتیں گائوں پہنچنے پر کہرام برپا ہوگیا۔ تفصیلات کے مطابق تھانہ بلوچنی جڑانوالہ کے نواحی گائوں 92ر۔ب جمشید کے نوجوان بھائی رمضان ، حیدر علی اور ان کا کزن ندیم محنت مزدوری کے سلسلہ میں ڈیرہ غازی خان کے علاقہ میں تھے۔ گزشتہ روز گٹر کی صفائی کے لیے اترے تو وہاں موجود گیس سے ان کا دم گھٹ گیا جس سے ان کی موت واقع ہوگئی۔ متوفیان کی نعشیں جڑانوالہ آبائی گائوں پہنچنے پر پورا گائوں اشکبار ہو گیا۔ معززین علاقہ نے وزیر اعلیٰ پنجاب سے درخواست کی کہ متوفیان کے ورثاء کی مالی امداد کی جائے۔ واقعہ کی اطلاع ملنے پر ڈپٹی کمشنر فیصل آباد سردار سیف اللہ ڈوگر، اسسٹنٹ کمشنر عمر دراز گوندل تعزیت کیلئے ان کے گھر گئے۔