اسلام آباد (سٹاف رپورٹر) بری فوج میں اعلیٰ سطح کے تبادلوں کے ذریعہ رواں ماہ کے اواخر میں خالی ہونے والے عہدے پیشگی پر کر دئیے گئے ہیں۔ آئی ایس پی آر کے مطابق لیفٹیننٹ جنرل وسیم اشرف کو بری فوج کی جنوبی کمانڈ کا نیا سربراہ مقرر کر دیا گیا ہے۔ وہ اس ماہ مدت ملازمت پوری کر کے سبکدوش ہونے والے لیفٹیننٹ جنرل عاصم سلیم باجوہ کی جگہ لیں گے۔ لیفٹیننٹ جنرل اظہر عباس کو کور کمانڈر راولپنڈی تعینات کیا گیا ہے۔ انہوں نے لیفٹیننٹ جنرل بلال اکبر کی جگہ لی ہے۔ اسی طرح جی ایچ کیو میں لیفٹیننٹ جنرل خالد ضیا انسپکٹر جنرل آرمز، لیفٹیننٹ جنرل چراغ حیدر کو جوائنٹ سٹاف ہیڈ کوارٹرز میں ڈی جی اور لیفٹیننٹ جنرل بلال اکبر کو نیا چیئرمین پی او ایف تعینات کیا گیا ہے۔ پی او ایف کے موجودہ سربراہ لیفٹیننٹ جنرل صادق علی بھی مدت ملازمت پوری کر کے سبکدوش ہو رہے ہیں۔ یاد رہے کہ گزشتہ روز پاک فوج کے چار میجر جنرلز کو لیفیٹننٹ جنرلز کے عہدے پر ترقی دی گئی تھی۔