لاہور (نمائندہ سپورٹس+ سپورٹس رپورٹر) پاکستان کے پروفیشنل باکسر محمد وسیم نے شاندار کم بیک کرتے ہوئے ورلڈ رینکنگ فائٹ جیت لی۔ انہوں نے فلپائنی حریف باکسر ونراڈو ٹینامور کو پہلے راؤنڈ کے پہلے منٹ میں وی ناک آؤٹ کرتے ہوئے پروفیشنل باکسنگ کیریئر کا بارہواں مقابلہ جیتا۔ دبئی کے مرینہ باکسنگ ایرینا میں ہونے والے مقابلے میں فلپائنی حریف کو انہوں نے 1منٹ 20 سیکنڈ میں مات دے دی۔ یہ ان کے کیریئر کی بارہویں جیت ہے جس کے بارے میں گفتگو کرتے ہوئے محمد وسیم نے کہا کہ اپنی جیت کو کشمیریوں اور پاکستانی عوام کے نام کرتا ہوں۔ مقابلے سے قبل ہی میڈیا سے گفتگو میں انہوں نے اپنی جیت کے لیے عزم کا اظہار کیا تھا۔ 32 سالہ انٹرنیشنل باکسر محمد وسیم کا تعلق بلوچستان کے صوبائی دارالحکومت کوئٹہ سے ہے۔