لاہور (نمائندہ سپورٹس) پنجاب لان ٹینس ایسوسی ایشن کے زیراہتمام رافم جونیئر ٹینس ٹورنامنٹ بلال عاصم نے جیت لیا۔ بلال عاصم نے انڈر 16 اور انڈر 14 ٹائٹلز اپنے نام کیے۔ مہمان خصوصی سی ای او رافم گروپ زاہد حسین اور سیکرٹری پنجاب لان ٹینس رشید ملک نے کھلاڑیوں میں انعامات تقسیم کیے۔ بلال عاصم اور فیضان فیاض کے درمیان انڈر16 کا فائنل بہت ہی زبردست رہا۔ پہلا سیٹ بلال عاصم نے 6-3 سے جیتا جبکہ دوسرا سیٹ فیضان فیاض نے 6-4 سے جیتا۔ سپر ٹائی بریک پر بلال عاصم نے میچ 10-7 سے جیت کر ٹائٹل اپنے نام کیا۔قبل اس سے انڈر 14 کے فائنل میں بلال عاصم نے شاہیل دراب کو 4-0, 4-2 سے ہرا کر ٹائٹل جیتا۔ انڈر 16 ڈبلز میں عبدالحنان خان اور حسن علی نے فیضان فیاض اور بلال عاصم کو 5-4, 4-1 سے ہرا کر ٹائٹل جیت لیا۔ انڈر 12 کے فائنل میں اسد زمان نے احتشام ہمایوں کو 8-3 سے ہرا دیا۔ انڈر 12 ڈبلز فائنل میں اسد اور احتشام ہمایوں نے زوہیب افضل ملک اور حانیہ منہاس کو 4-0, 4-1 سے ہرا دیا۔ انڈر 8 میں پہلی پوزیشن محمد عبدالرحمان، دوسری پوزیشن فجر فیاض، تیسری پوزیشن حبیب اللہ، انڈر 6 میں پہلی پوزیشن قرات کاشف، دوسری پوزیشن زینا شاہیان، تیسری پوزیشن علی شیراز نے حاصل کی۔