ملتان (فرحان ملغانی سے) محکمہ تعلیم پنجاب کا ’’کارنامہ‘‘ انسداد ڈینگی مہم کے سلسلہ میں سابق وزیراعلیٰ پنجاب میاں شہباز شریف کی تصاویر کیساتھ پرانا معلوماتی کتابچہ سکولوں کے طلبا و طالبات میں تقسیم کروانے کیلئے جاری کردیا۔ 42 صفحات پر مشتمل معلوماتی کتابچہ میاں شہباز شریف کی تصاویر کے ساتھ تقسیم ہو جانے ‘ نشاندہی ہونے پر محکمہ تعلیم افسران میں کھلبلی مچ گئی اور فوری طور پر کتابچہ سے سابق وزیراعلیٰ پنجاب کی تصاویر ہٹوا دی گئیں۔ذرائع کے مطابق پنجاب حکومت کی زیر نگرانی جاری انسداد ڈینگی مہم کے سلسلہ میں سکول ایجوکیشن ڈیپارٹمنٹ کو خصوصی ہدایت جاری کی گئی کہ طلبا و طالبات اور اساتذہ کو انسداد ڈینگی مہم کا حصہ بنایا جائے اور طلبا ء و طالبات کے ذریعے ڈینگی سے بچاؤ کیلئے شعور بیدار کیا جائے۔