لاہور(سپورٹس رپورٹر+نمائندہ سپورٹس) سری لنکن کپتان لہیرو تھریمانے نے دورہ پاکستان کو یادگار قرار دیتے ہوئے کہا ہے کہ وہ دوسروں ٹیموں کو بھی پاکستان آنے کا مشورہ دیں گے۔انہوں نے کہا کہ مجھے اپنی ٹیم پر فخر ہے کیونکہ انہوں نے بہت اچھی فائٹ کی۔ 297 اچھا سکور تھا لیکن اس کے بعد ہم گیند سے ابتدائی 10-15 اوورز میں منصوبہ بندی کے مطابق کھیل پیش نہ کر سکے۔ شکست کے باوجود مجھے اپنی ٹیم کی مجموعی کارکردگی پر فخر ہے، داسن اور شیہان نے بہت عمدہ بیٹنگ کی جبکہ پاکستان کے اس باؤلنگ اٹیک کے خلاف گوناتھیلاکا کی سنچری بھی بہت بڑا کارنامہ ہے۔تھریمانے نے کہا کہ یہ میرا پہلا دورہ پاکستان ہے اور یاں آ کر کھیلنے کا تجربہ بہت اچھا اور یادگار رہا، میں دیگر ٹیموں کو بھی پاکستان آ کر کھیلنے کا مشورہ دوں گا۔