لاہور(سپورٹس رپورٹر+نمائندہ سپورٹس) پاکستان کرکٹ بورڈ کے چیف ایگزیکٹو وسیم خان نے کہا ہے کہ لاہور کی عوام نے مہمان سری لنکن ٹیم کا بہت اچھا استقبال کیا ہے، خوشی ہے سری لنکا کی ٹیم آئی ہے ان کا پاکستان میں اچھا تجربہ رہا۔ قذافی سٹیڈیم میں میڈیا سے گفتگو کرتے ہوئے ان کا کہنا تھا کہ پاکستان کے لیے ٹیسٹ کرکٹ بہت ضروری ہے، امید ہے دسمبر میں سری لنکن ٹیم ٹیسٹ سیریز کے لیے آئے گی۔خوشی ہے سری لنکا کا دورہ کامیاب رہا۔ سپورٹر بھی چاہتے ہیں سری لنکا دوبارہ پاکستان کا دورہ کرے۔ ان کا کہنا تھا کہ آسٹریلیا اور انگلینڈ ٹیم کے دورہ سے پہلے نیوزی لینڈ اور جنوبی افریقہ کے ٹیمیں آئیں گی۔ بنگلہ دیش کرکٹ بورڈ کا سیکورٹی وفد سکیورٹی انتظامات کے لیے پاکستان آئے گا۔امید ہے سری لنکا کی ٹیسٹ ٹیم کے بعد جنوری میں بنگلہ دیش کی ٹیم آئے گی۔