لاہورر(نمائندہ سپورٹس+سپورٹس رپورٹر) پاکستان کی ٹیم کو سری لنکا کے ہاتھوں شکست سے کئی سوال کھڑے ہوگئے ہیں۔میزبان کو مہمان ٹیم کے ہاتھوں شکست کے بعد ٹیم سلیکشن سمیت کھلاڑیوں کی پرفارمنس پر بہت سے سوالات اٹھ رہے ہیں۔احمد شہزاد اور عمر اکمل واپسی کے بعد بھی کارکردگی نہیں دکھا سکے، قومی ٹیم کی نہ بیٹنگ چلی اور نہ ہی باولنگ۔عمر اکمل تین سال کے بعد ٹیم میں واپس آئے اور پہلی کی گیند پر آوٹ ہو گئے۔ سوشل میڈیا صارفین اور شائقین سوالات اٹھا رہے ہیں کہ احمد شہزاد اور عمر اکمل کو کس بنیاد پر ٹیم میں شامل کیا گیا۔کپتان سرفراز احمد کی کارکردگی اور فٹنس بھی تنقید کی زد میں ہے۔شائقین کا کہنا ہے کہ فخر زمان، حارث سہیل بہترین انتخاب ہیں اور ان کو میدان میں نہ اتارنے کی وجہ سمجھ سے بالاتر ہے۔بیٹنگ کیساتھ ساتھ دنیا کے عمدہ گیند باز بھی سری لنکن بلے بازوں کے سامنے کارکردگی نہیں دکھا سکے۔ محمد عامر اور فہیم اشرف کی کارکردگی بھی مایوس کن رہی۔