لاہور(سپورٹس رپورٹر+نمائندہ سپورٹس) پاکستان کرکٹ ٹیم کے چیف سلیکٹر اور ہیڈ کوچ مصباح الحق نے کہاہے کہ ایسی ٹیم سے ہار جس کے اہم کھلاڑی نہ ہوں، آنکھیں کھولنے کیلئے کافی ہے۔ ہار کبھی اچھی نہیں ہوتی لیکن ایسی ٹیم سے ہار جس کے مین پلیئرز نہ ہوں، آنکھیں کھولنے کیلئے کافی ہے۔سری لنکا ٹیم اچھا کھیلی، جس طرح یارکرز سری لنکا نے کیے ہم نہیں کرسکے، بولنگ کے شعبے میں بہت کام کرنا ہے، وقار یونس آئے ہیں، اس پر کام کریں گے۔ شاداب خان محنت کررہا ہے لیکن فارم نہ ہونے کی وجہ سے دبا وکا شکار ہے، اس کا اعتماد بحال کرنا ہے۔3 برس صبرکیا، ابھی تو میری پہلی سیریز ہے، سب سری لنکا کو کمزور ٹیم کہہ رہے تھے اور ہمیں کہا جارہا تھا کہ نئے کھلاڑیوں کو کھلائیں لیکن اب سب نے نتیجہ دیکھ لیا؟ انٹرنیشنل کرکٹ میں کسی کو کمزور نہیں کہہ سکتے۔بابر اعظم نے رنز نہیں کیے، ہم ایکسپوز نہیں ہوئے، ہم نے دیکھنا ہے کہ صرف ایک بیٹسمین پر انحصار نہیں کرنا، ہم اچھا کررہے تھے لیکن اس سیریزمیں اچھا نہیں کر سکے۔ پاکستان ٹیم مینجمنٹ کی جانب سے تیسرے میچ میں بھی تبدیلیاں متوقع ہیں۔ گذشتہ روز دونوں ٹیموں کے کھلاڑیوں نے پریکٹس سیشن میں حصہ لینے کی بجائے ہوٹل میں آرام کو ترجیح دی۔ حارث سہیل کو ٹیم میں شامل کئے جانے کاامکان ہے۔ محمد عامر‘ عمر اکمل کو ٹیم سے ڈراپ کرکے فاسٹ بائولر عثمان شنواری کو موقع یا جاسکتا ہے ۔