لاہور(سپورٹس رپورٹر+نمائندہ سپورٹس) سری لنکاسے ٹی ٹونٹی سیریز میں کلین سویپ کے بعد پاکستان ٹاپ پوزیشن بر قرار رکھے ہوئے ہے۔ سری لنکانے ایک درجہ ترقی کرلی ہے۔ سری لنکاکے ہاتھوں ٹی ٹونٹی سیریز میں تین صفرکے کلین سویپ سے پاکستان کے پانچ پوائنٹس کم ہوگئے ہیں ، تاہم دوسوچوہترپوائنٹس کے ساتھ گرین شرٹس کی ٹاپ پوزیشن برقرارہے۔ دوسرے نمبر پرفائزانگلینڈ پرگرین شرٹس کواب بھی آٹھ پوائنٹس کی برتری حاصل ہے۔ جنوبی افریقہ تیسرے،بھارت چوتھے، آسٹریلیاپا نچویں اور نیوزی لینڈ چھٹے نمبر پرہے۔ کلین سویپ فتح کی بدولت سری لنکانے اپنے پوائنٹس دوسواکتالیس کرلیے اورافغانستان کوپیچھے چھوڑ کرساتویں نمبر پرترقی کرلی ہے۔بیٹنگ میں پاکستان کے بابراعظم بدستورٹی ٹونٹی کے نمبرایک بیٹسمین ہیں۔ فخرزمان تین درجہ نیچے چودہویں نمبر پرچلے گئے ہیں۔ بائولنگ میں عماد وسیم کی افغان کپتان راشدخان کے بعد دوسری پوزیشن قائم ہے۔ شاداب خان ایک درجہ تنزلی کے بعد تیسرے سے چوتھے نمبر پر پہنچ گئے ہیں۔ فہیم اشرف تین درجہ تنزلی کے بعد سترہویں اور محمدعامردودرجہ ترقی پاکر تینتیس ویں نمبر پرفائز ہوگئے ہیں۔