لاہور( سپورٹس رپورٹر) سابق کپتان رمیز راجہ نے بابر اعظم کو ٹی ٹونٹی کپتان بنانے کے فیصلے کی حمایت کر دی۔سابق ٹیسٹ کرکٹر اور کپتان کا کہنا ہے کہ قومی ٹیم کو نوجوان قیادت کی ضرورت تھی،پی سی بی نے بابر اعظم کو کپتان بنانے کا بہادرانہ فیصلہ کیا۔ بابر اعظم ٹی ٹوئٹی کرکٹ کے تقاضوں سے ہم آہنگ ہیں،اگر اچھی کارکردگی دکھائی تو آگے چل کر ٹیسٹ ٹیم کے بھی کپتان بن سکتے ہیں۔ پاکستان یواے ای میں ہوم سیریز کے میچز ہار رہا تھا،ورلڈکپ کے سیمی فائنل تک رسائی نہ حاصل کرسکا،ٹی ٹونٹی سیریز میں سری لنکا کی بی ٹیم کے ہاتھوں شکستوں کا سامنا کرنا پڑا۔اظہر علی کو ٹیسٹ کپتان بنانے کے حوالے سے کہا کہ ذاتی کارکردگی اچھی نہ ہونے کے وجہ سے اظہر علی سخت دبائو میں ہوں گے،وہ دورہ جنوبی افریقہ میں شارٹ گیندوں کا سامنا کرتے ہوئے مشکلات کا شکار نظر آئے، آسٹریلیا میں اسی طرح کے حالات ہوں گے،اگلی ٹیسٹ سیریز میں انھیں سخت محنت کرنا ہوگی۔