جعفر میموریل انٹر سکول ہاکی ٹورنامنٹ، ایچی سن کالج اور کیمپس بوائز سکول کے مابین افتتاحی میچ برابر
لاہور(نمائندہ سپورٹس)51 واں جعفر میموریل انٹر سکول ہاکی ٹورنامنٹ شروع ہوگیا۔ ایونٹ کے افتتاحی میچ میں ایچی سن کالج اور کیمپس بوائز سکول کے مابین میچ ایک ایک گول سے برابر رہا۔علی انسٹی ٹیوٹ گراؤنڈ پر افتتاحی تقریب کے مہمان خصوصی انٹرنیشنل ہاکی پلیئر قاسم خان نے ہٹ لگاکر مقابلوں کا آغاز کیا ۔ میچ کے پہلے ہاف میں ایچی سن کالج کی جانب سے ہنزلہ آفریدی نے گول کرکے اپنی ٹیم کو سبقت دلائی جو کھیل ہاف ٹائم تک برقرار رہی۔ دوسرے ہاف میں کیمپس بوائز کی ٹیم نے مخالف ٹیم کے گول پر تابڑ توڑ حملے کئے جس کے نتیجہ میں حسنین ارشد نے ڈی کے باہر سے ملنے والی فری ہٹ کو جال میں پہنچا کر میچ ایک ایک گول سے برابر کردیا۔ میچ کے اختتام پر ایونٹ کے آرگنائزر کی جانب سے پرنسپل ایچ سن کالج کو شیلڈ پیش کی گئی۔
