لاہور (سپورٹس رپورٹر+نمائندہ سپورٹس) ظفر گوہر اور بلال آصف نے سنٹرل پنجاب کوقائداعظم ٹرافی میں ایک اورکامیابی دلادی۔ فیصل آباد میں سنٹرل پنجاب نے ناردرن کو 204 رنزسے شکست دیکر ٹورنامنٹ میں تیسری فتح حاصل کرلی۔ ظفر گوہر اور بلال آصف نے 381 رنز کا تعاقب کرنیوالی ناردرن ٹیم کو 176 رنز پر ڈھیر کردیا۔ ظفر گوہر نے دوسری اننگز میں 7کھلاڑیوں کو پویلین کی راہ دکھائی‘پہلی میں چار کوآئوٹ کیا تھا۔ بلال آصف نے دونوں اننگز میں 3، 3 بلے بازوں کا شکارکیا۔میچ کے آخری روز ناردرن نے 5وکٹوں پر 121 رنز سے کھیل کا آغاز کیا توآخری 5 بلے باز 62 رنز کاہی اضافہ کرسکے اور پوری ٹیم176رنز پر ڈھیر ہوگئی۔سنٹرل پنجاب کے 226 رنز کے جواب میں ناردرن کی پوری ٹیم 191 رنز بنا کر آؤٹ ہوگئی۔ سنٹرل پنجاب نے 6 وکٹوں پر 345 رنز بنا کر دوسری اننگز ڈکلیئر کردی تھی۔